Fréttir:

Mikil þátttaka er á UT2001

Miðvikudaginn 7. mars hafa yfir 600 manns skráð sig. Flestir eru úr Verslunarskóla Íslands þaðan eru um 40 manns skráðir.
Nokkrir tugir kennarar koma úr fleiri skólum og frá nokkrum smærri skólum eins og Varmalandsskóla koma um það bil allir starfandi kennarar og stjórnendur. UT2001 er orðin stærri en UT99 og er í reynd ein stærsta ráðstefna sem haldin hefur verið á Íslandi

Dags. 7. mars 2001

Kasmírfréttir

Nemendur úr áttunda og níunda bekk Varmalandsskóla munu gefa út fréttavefinn Kasmírfréttir á UT2001. Nemendurnir munu skrifa fréttir, taka viðtöl við gesti og fyrirlesara og taka myndir af ráðstefnunni og setja á fréttavefinn. Nemendurnir munu hafa aðstöðu á bókasafni Borgarholtsskóla, þar sem ráðstefnugestir geta fylgst með vinnu þeirra.

Dags. 2. mars 2001

Tónlistargjörningur eitt af atriðum setningarinnar

Við setningur ráðstefnunnar munu tónskáldin Hilmar Þórðarson og Ríkharður H. Friðriksson flytja tónlistargjörning með Lightning, hljóðfærði sem nemur innrauðan geisla og breytir honum í tónlist.
Hilmar og Ríkharður hafa veitt Tónveri Tónlistarskóla Kópavogs forstöðu frá upphafi en það var stofnað árið 1995.
Ákveðið var að bjóða upp á nám þar sem tölvutónlistin var aðalfag eða eins og segir í upphaflegri námslýsingu „Ætlunin er að úr þessu verði til ný tegund íslenskra tónlistarmanna, tölvutónlistarmenn, með tölvu sem aðal- „hljóðfæri"...". Þetta var algjör nýjung við tónlistarkennslu hér á landi en reynslan hefur sýnt að bráð nauðsyn var á, því slíkar hafa viðtökurnar verið.

Strax var ljóst að tilkoma tónversins opnaði margvíslega möguleika og því hefur á það verið lögð mikil áhersla að leggja sitt af mörkum á vogaskálar íslenskrar menningar. Má þar nefna verkefni til varðveislu íslensk tónlistararfs, með endurvinnslu og varðveislu gamalla upptaka, þátttöku í flutningi á íslenskri tónlist og með þátttöku og skipulagningu á ART2000 fyrstu alþjóðlegu tölvutónlistarhátíðinni á Íslandi sem nýlega var útnefndur tónlistarviðburður ársins hjá Dagblaðinu.

Með flutningi tónversins í nýtt og stórglæsilegt Tónlistarhús Kópavogs hafa opnast nýjir möguleikar til tónlistarflutnings sem áður voru óþekktir hér á landi.

Dags. 21. febrúar 2001

Aðalfyrirlesari ráðstefnunnar er dr.Patricia L. Rogers.

Hún starfar nú á Íslandi sem Fulbright kennari á sviði upplýsinga-tækni við Kennaraháskóla Íslands. Patricia L. Rogers lauk doktorsnámi frá University of Minnesota þar sem áhersla er lögð á "Instructional Systems and Technology", tölvur og nýtingu þeirra í námi. Í erindi sínu "eLearning: The Forced Evolution of Higher Education" mun hún fjalla um þær miklu breytingar sem orðið hafa á háskólamenntun vegna áhrifa upplýsinga- og samskiptatækni. Hugtakið "eLearning" á við allt nám sem er tæknistutt.

Rætt verður um kröfur markaðarins, gæði náms, aðgang að námi og ráðstöfunarfé til byggingarmála í samanburði við það fjármagn sem veitt er til dreifmenntunar.

Dags. 19. febrúar 2001